Uagut soorlu meeqqat pinnguartut

Feriaannavippugut, Nick, Steve, Knud Svendilu sisoraaserlutik sermersuaq itivereerlugu oqarput

Nuanneq, Nick Nielsen Knud Kristensenilu 1998-imi sermersuaq itivereerlugu taama unnersiorput. Aasianni GU-mi ilinniartut siornaak kalaaliinnaallutik sermersuarmik itiveeriaraluarminniit qiimanerulluinnarput.

Taamanikkut taquaaruttoorlutik ulluni arlalinni nerisaqarsimannginnamik kiisa Knud ajutuulivikkaluarpoq. Nick-illu ajutuulernermi kalerrisaarut aallartimmagu helikopterimik aaneqarlutik angerlaanneqarput.

Knud sapaatit akunnerisa pingasut ingerlanerinnaanni 16-inik oqilisimasoq timiminik panerpallaartuulersimagaluarami ulluni arlalinni tarajulersuuteqartinneqartariaqarpoq.

— 1996-imi taquakippallaarsimagatta, taakku isumaqatigiillutik oqaluttuarput. Tamannalu ilinniutigisimaqaarput.

Ilikkagaqaannarsimanngillat, nukappissalli imminnut nukappiaqqanik inersimasunik taasut suli pinnguarlutillu qiimaqaat.

Palersimasut

Sermersuarmik itiveeqqammeraluarlutik qiimallutillu peqqippaseqaat. Ulussareqalutillu sanigorsimasutut atisaminnik angersalersimarpasinngilluaasarput. Kilunik marlussunnguanik oqilisimagunaraluarput, malunnaanngitsumilli.

Palersimaqaat - uaarartitilaarsimallutik - qiimalluinnarpullu.

Knudikkut Nickillu 1998-imi angalaqatigaat GU-mi atuaqatigisimasartik Steve Berthelsen sisimiormiorlu Svend Svær, Nickip ukioq Tecknikumimi Odensemiittumi naapissimasaa.

— Tamatumuunakku angalerput allaanerujussuuvoq, Knud Kristensen oqaluttuarpoq. Ullut marlussunnguit kisiisa pinnagit silagissiuinnavippugut. Kiangaarmallu uanga nasara atunngivippara.

— Naammattunillu taquaqarpugut. Tamakkulu isumakuluutiginagit allanut nukissaqarnaqaaq. Apummik inuusarujussualiorlutalu, timersorluta unimmiuaartarlutalu, nallukattartarlulutalu backgammonertarpugut Vm-erlutillu isikkamik arsaattut radiukkut tusarnaartarlugit. Nuannisaaginnavippugut. Apuunniapiloornissaq isumakuluutiginngivipparput. Iternissatta tungaanut sinissinnarluta qasunissatta tungaanut ingerlaartarpugut. Nuannisaaginnavilluta.

Marloriaammik taquaqarput

Nukappiararujussuit isumakuluuteqarsimanngingaaramik Nickip sermersuup aattornerata kuunnera qulaateriaraluarlugu isittooraluarsimanera Knud-illu quppaq ikaarniarlugu qamuteeqqaminik quppamut nakkartooraluarsimanera quianarluinnartutut isigaat.

Nickikkut Knud-illu 1996-imi misigisimasatik anusinnguutigisimammatigit nukappissat sisamat junip tallimaanni aallarput 1996-imut sanilliullugu marloriaammik taquaqarlutik. 1996-imituut Qasigiannguaniit aallarlutik Tasiilap kujataani Isortup tungaanut ingerlaarput.

Aallarput ulluni 50-ini 5000 kaloriakkuutaartunik nerisassaqarlutik. Taamalu qamuteeqqat 115 kg-inik usillit uniagassaralugit.

Ingerlalluassangariaramik aallaqqaataani ullup aappaa avillugu nerisassatik nerisarlugit ingerlapput, sunaaffalumi torrallaaginnarlutik, tassami angalaneq katillugit ullunik 25-inik sivisussuseqarmat.

Ullut amerlanersaanni ullormut 20-30 kilometerit ingerlasarpaat, ullulli ilaanni oqumilluariaramik tupertik tingerlaasiuteriarsinnarlugu nalunaaquttat akunnerini 36-ini 100 kilomterit ingerlasimavaat.

— Nalunaaquttap akunneranut 21 kilometerinik sukkassuseqartarluta GPS-ikkut takusinnaavarput.

Aallaqqissapput

Nick Stevelu angalaqqissamaartorujussuupput. Sermersuaq itiveqqikkusullugu:

— Sermersuarmiilluni misigisaq immikkorluinnaq ippoq. Eqqissilluinnarluni angalaarluni. Amerlasuut takorluuisarnerattut nuanniinngilluinnarpoq. Qanorli issusia oqaluttuariuminaatsorujussuuvoq.

Knud-illi sermersuaq qatsutiisassimavaa. Tullianik allamut angalassamaarunarpoq.

Svend-imi. Oqaloqatigineqarmata Svend najuutinngilaq. Pulaarsimagami - neriartorluni.

Aammami GU-qatigiissimasut pingasut angalanissamik aaqqissuussisuusimapput. Ilulissanit, Qasigianngunit Qeqertarsuarmiillu pisuullutik siornaakkunni Aasianni GU-qatigiissimapput. Aasiaallu Kommuniat angalanissaannik aningaasaliisuusimammat maanna taakku aqqi tassunga attuumassuteqarluinnalersimapput.

Aalajaassuserlu apeqqutaasimanermat nukappissat isumaqatigiilluinnarlutik oqarput, maanna Aasiaat illoqarfimminniit nuannarinerulersimagitsik.

Angalanissaq siulleq pingasuullutik pilersaarusiorsimavaat. Taamanikkulli Steve angalaqataasinnaajunnaarsimavoq. Ilani sisorarnermik ilinniartikutsoorsinnarlugit. 1996-imi sermersualiarnissamut sungiusaatitut Kangerlussuarmut uterlugulu pisussimapput. 1996-imi ajutooqqajarnerup nukappissat taakku qunullertissimanngilai. 1997-imi qaannamik Aasianniit Kullorsuup tungaanut ingerlaarput, maannalu 1998-imi sermersuaq itivippaat.

— Naak angalanerit taakku katillutik qaammatinik sisamaannarnik sivisussuseqarsimagaluartut taamaattoq nipangiutinngisaannarpagut. Puigunaatsorpassuarnik migisaqarnikuugatta. Tamakkulumi puigunngisaannagassaraagut.

Angalaqataarusuppit?

Aasaq manna angalanissaq sivisuumik pilersaarusiorneqarsimanngilaq. Nick Danmarkimiilluni Teknikumimi Odensemiittumi atuakkerikartalluinnarpoq, majilu aallartilaartoq Stevemut sianerpoq: Angalaqataarusuppit?

— Julip aallaqqaataani politiinngorniarlunga atualinnginninni aningaasarsiupallakkusukkaluarlunga erngerluinnarlunga akuersivunga. Maanna aningaasaateqanngilanga, peqqissimiinngilangali. Kingusinaalaarlungalu atualernissannut akuerineqarnikuuvunga.

Knud aamma erngerluinnarluni akuersisimavoq.

Svendilu Teknikumimeersoq aamma sermersuarmik itiveeqataarusuppoq.

Qaammat ataaseq missiliuinnarlugu qaangiummat aallariikatapput.

— 1996-imi misileeqqaarnerput ilinniutigisimaqaarput, Nick oqaluttuarpoq. Taamanikkut oqarpugut: Pilersaarusiortariaqanngilagut. Maannali pilersaarusiornissaq qanoq pingaartigisoq ilikkarsimalerparput.